“ ‘D’ POOR BOY FROM LUBAO”
DIOSDADO PANGAN MACAPAGAL
Neng P. L. Frank M. Guinto
Sta. Maria Macabebe,Pamp.
April 19, 2010
1
Tigtig ding kumpana,
Ginising deng diwang maluat nang manikal
Ing diwang malyasa,
King sigalot ning bie pilit makipagkal,
Laksang-libung kutang,
Ing lihim memale, king isip migbusal
Ba’t kayaplegaria,
Agunyas ing kabling, kablas ding dupikal?
King Bundok Alaya,
Dening panimanman, layu kung pinasyal
Ba’t kule lang paldas,
Ding yata ning aldong malale nang lalual?
Maglawiwing batis,
Matamle’t malumbe ing danum ng kristal
Baket iting bage,
Giluan ne’ng diwang suko na king pagal?
Inia pala’ng sabla,
Magmalun - tatangis king lumbe a sakdal
Iti pala’ng aldo,
Yang kematayan ng DADONG MACAPAGAL!
2
Ibat pa king mula,
Iniang mikaisip, manalbe zarzuela
“Bayung Jerusalem”,
Alang makayanti king pangasulat na
Y Apong Urbano,
Maluat nang lemayan, a obra maestra
Pane reng pamitan,
Ding sablang manalbe kareng balang fiesta;
Gaganap kanita,
Matikding artista bilang peka-bida
Yapin y Cong Dadong,
“Partner” ne’y Purita, y Roger yang kontra;
Lalo pang milusuk,
Respeto ding malda pati na’y Ventura
Iniang mag-“exam” ya,
“Topnotcher” ya keng “Bar”, kursung Abogasya;
Iti aliwa mu,
Iniang luban na ya itang pulitika
Meging Congressman ya,
Kaibat, meging Bise’t- meg Presidenti ya!!
King kematayan na,
Ala kung ayampang king budning poeta
Nune mu ing bukud
Lamak kung pitagning, malukang poesia!
Kagum ning pakamal,
Lugud a dalise, gintung panalala
Keng “poor boy” ning Lubao,
A mipuk king puri’t dangal ning Pampanga!
3
Budning Macapagal:
Ing kekong tagumpe, nung kakung sambitlan
Musmus kung paniulat,
Eya makabage king kekong kamalan,
Ing “Pluma ning Dios”,
Nung pagkalub Niya sa, kaku Ne iparam
Gulis keng manene,
Ing bie yung dakilang mitmung kabayanyan,
Dapot makanyan man,
King abot ning diwa, kakung pagpilitan
Saglawe mapilan,
King bie yung tinindag busal ning kalukan,
Ing pangapantas yu,
Pepatilip yu na, iniang kayanakan
Pane kong mumuna,
Kareng kaklase yung anac mayakayan!
Inia, uliniti,
Y Honorio Ventura, a pilantropong nuan
Pegaral na kayu,
Keng kursung mamingwa kaniang katuliran,
Pepalto ye kinang
Ing literature, ning Indung Balayan
Iniang keng kampanya
Ding kekong diskurso, makarima la ngan!
Ngeni ku menuala
Busal ding kalulu, atin matenakan,
Pigkalaman ning Dios,
King ban manibabo kagiwa’t kabiasnan
Kaustan na niti
Pamanungkulan na, alang dusing ditman
Liguran nong lubus
“Lupa ng kalulung mitmung katapatan!”
Inia Apong Dadong,
King kematayan yu, ‘kulio ming masikan
Mapuri yung lagyu,
MANA YANG LIKUAN YU…KEKENG KAPAMPANGAN!
Chant D’Amour
Mapilan a kayagtalan ibat ketang poesyang “Sintang Cayanacan” nang Diosdado “Cong Dadong” Macapagal
E cu balu a nung baquit tutu ra nacang palsintan
Nung ala ca anti uaring saui nacu capalaran;
E raca buring micauani quening cacung panimanman,
Magcang mabigu cu palad at e mu nacu datangan;
Pangalaluan co ring balang taung quecang paquisabian,
At detang caluguran mu tutu cu lang caluguran;
Quening dalise lugud cu buri cung salpantayanan
Melalang ing pamalsinta ba'ra ca mung pacamalan.
E cu lalon ing bili mu at ing pamicandayu ta,
Ing sarili mung lalon cu ing acu palsintan daca;
Aguiang metung cu pang ari at sacup daca mung mura'
Ibuat daca qng calucan at samban anti mong reina;
O acu itang pulubi, ica metung cang princesa,
Cailian mucu nung buri mu, malsinta cu murin queca'
Anting ambun ibat babo a milapit qng sampaga,
Macanian dacang luguran aguiang nanu cu't nanu ca'
Milalablab ya ing bulan, macauili ing sala na,
Quilapquilap la ring batuin anting magayut a mata;
Ding ayup biasa lang dalit, ding pipit babo saresa,
Ding denas babo ring luyus atin lang yampang a canta;
Ding sampagang mangabanglu ing carelang pangisnaua
Bisa yang pali ing ambun qng candunga'na ning rosa;
Deti ila ring amanu ning tapat cung sinta queca.
Canita ba'mung abalu icang bie cu at caladua.
Palsintan daca, irug cu, yang quecang pacayasajan,
Anggang marnagus 1a danum ding sapa at cailugan;
E mapaui ing sinta cu anggang atin cung babaluan
Cayanacan a pailupig, paimate qng capalsintan:
Anggang atin mung sampagang tutubu caring tanaman,
Anggang atin mung maniale ayup caring cabunducan,
Anggang ining pali ning bie mamagus quening catauan,
Bucud mung ining sinta cu e manaquit camatayan.
Ing poesyang “ ‘D’ POOR BOY FROM LUBAO” ginale ne mu naman ning kinudtang I P. L. Frank M. Guinto, kabang dng kayagtalan a estropa ning poesyang “Sintang Cayanacan” ginale da neman di Poetisa Maria Teresa M. Evangelista at Prinsipi ning Parnasu Romy Rodriguez ketang bisperas ning aldo (a-10 ning Abril 2010) nang kematayan ning melapupuring Ex-Presidenti Diosdado Pangan Macapagal keta kng Kapitolyu Kapampangan.
No comments:
Post a Comment