DM@100
Ing 2010, iya mong kadinalan nang banwang kebaytan ning melapupuring Diosdado Pangan Macapagal. Ing dating presidenti ning Republika ning Pilipinas. Ing a-21 ing aldo kebaytan ning dakilang presidenting ya kabud ibat kng pakakalulung pamilya. Ing pakatuking talambie sinulat neng G. Lord Francis Musni na megamit keting mesabing pamagmasusi na meganap kng Balen Lubao at Kapitolyu Kapampangan anyang a-20 ning bulan a iti kng pamanimuna na ning Center for Kapampangan Studies ning Holy Angel University kng kasawpan na ning Tanggapan ning Turismu ning kapitolyu.
MAKUYAD A TALAMBIE NANG DIOSDADO P. MACAPAGAL
(1910-1997)
(Sinulat at binasa neng Lord Francis Musni king makuyad a programa king kapitolyu, anyang bisperas ning aldo ng kamatayan Diosdado P. Macapagal, a-20 ning Abril 2010)
Mibait ya Lubao aniang a-28 ning Septyembri 1910 kari Urbano Macapagal at Romana Pangan. Meyari yang Valedictorian king Lubao Elementary School at minari yang sekundarya antimong kaduang diling matas king klase na Karin king Pampanga High School.
Megobra ya saugli king Bureau of Lands kabang papagaral na ing sarili na king kursong Associate in Arts karing king University of the Philippines. Mituknang yang magobra at magaral pauli ning meina ya katawan. Kaibat nang meyari king Associate in Arts, megaral yang pasibayu at kinanguang abugasya king Philippine Law School. Mituknang yang pasibayu pauli ning dimut a kwalta, a nu kaibat sinaupan ne ning kabaluan a pilantropo, Don Honorio Ventura. Inari ne ing kursung abugasya king UST inyang 1936 at mipasar ya at migbabo ya antimong topnotcher ning Bar Examination ita murin banuang ayta.
Kaibat ning giyerang hapon, migsilbi ya king Department of Foreign Affairs
Antimong kaduang sekretarya king embajada ning Pilipinas Karin king Washington, Estados Unidos. Inyang 1949, pepaulian neng Presidenti Quirino ban tagal konggresista salang king matalik nang kaluguran at kayabe poeta, Amado Yuzon, anu Karin sinambut neman.
King kekaba ning pamanungkulan na antimong konggresista, minupul yang dakal a pamagkilalal at parangal antimong metung karing pekamagaling at pekamasigasig a diputado.
Aniang 1957, tinagal ya naman at sinambut bise-presidenti lalam ning bandera ning Partido Liberal, bista man dakal a sunggabal king keyang pamangandidatu.
Sinambut yang presidenti anyang 1961, a nukarin dakal ya likwan a pamana king bansa:
1)Ing pamaglako king pamakisamak kapamilatan ning pamipasar king Agricultural Land Reform inyang 1963;
2)Pamaglipat king Aldo ning Kasarinlan o Independence Day ibat Hulyo 4 king Junio 12;
3)Ing MAPHILINDO o ing aguman da ring Asyanung bansa dane mauli a penibatan ning ASEAN ngeni;
4)Ing Decontrol Policy o ing malayang galo ning kwaltang Pilipino salang king Dolar Amerkanu;
5)Misubung king Pamakipaglualu king karapatan ning Pilipinas king Sabah Karin king Malaysia.
Dapot simbut neng Ferdinand E. Marcos king halalan ning 1965. Inyang 1971, kaibat ning makuyad a pamagpainawa, tinagal ya at sinambut assemblyman ning Batasang Pambansa. Dapot migsalita yang masikan salalng king gubyerno anyang alilan da ne inyang 1973 ing Saligang Batas ning Pilipinas ban mayun king pansarili nang capagnasan ning makalukluk a kapamahalaan. E mu nanu ing peligro binie na niti ning bie na at ning keyang pamilya.
Meangu ya bie anyang a 20 ning Abril 1997 at mikutkut king Libingan ng Mga Bayani.
Uyni pu ing makuyad a meapsi king sarili nang talambie sinulat aniang 1987:
Ing pekamaragul kung pagl\kalungkutan ing eku la man mo asaupan ring masang pakakalulu ban mitigko ka la ibat king malambat da nang pangatimawa king kasakitan bista man yang pekapun a kapagnasan ning kakung karera king pulitika. Linabas king lub ku, aku ing mumunang diling kalulu a milukluk Presidenti dapot eku mikwalta, aku na sana ing pekamasikan dang palad king karelang kanawan.
No comments:
Post a Comment